Direis ou preguntareis pul menos alguns de bós: mirai q’oulhai que… mas l qu’este, que, ultimamente, ten stado tan calhadico, andará por ende a fazer?
I, quien sabe, se nun direis tamien: seia cumo fur, de buona mos çafemos!… Ye que, assi, mos lhibremos de tener que star a aturá-lo!…
Preguntais, dezies bien i teneis bós toda la rezon!… Que, cumo se sabe i inda que, a las bezes, nun pareça, pa todas las cousas i todo quanto acuntece hai siempre ũa rezon de ser, anque nin siempre rezonable… I, cumo stá bien ber, tamien neste causo nun haberie de ser çfrente…
Mas podeis quedar çcansados, que nun ye, pori, por tener stado malo!…
I, tamien podeis crer, queda-bos yá eiqui la amanaça: nun habeis de perder pula demora!…
Bai yá para alguns meses, nun tengo screbido nada que se beia ou, dito d’outra i melhor maneira, que se puoda amostrar!… Mas, berdade seia dita: ye que, ne ls últimos tiempos, tengo andado, por ende i por donde calha, a fazer que fago i, por bias disso, un cachico acupado cun algũas anzonices. D’outubro para acá, an eiquipa cun mais trés ou quatro amigas i amigos, tengo andado, por eiqui i por eilhi, ou seia, por algũas de las capitales de çtrito i outros sítios de l paiç, ou melhor, de l Cuntinente – mas loinje de mi querer lhebar-bos a pensar que seia l de l tiu Belmiro, de la família de ls Azebedos i de la sue giente!… – a cumbersar, i tamien a botar i spalhar ũas palabricas – hai quien, an beç disto, diga sembrar i questume, anté, chamar-le formacion –, culs diretores de ls agrupamientos i scolas d’algũas de las nuossas porbíncias: Algarbe, Alenteijo, Ribateijo, Stremadura, Beira Litoral i Douro Litoral. I, anté al final deste més, cuntinarei inda a andar por ende a cunsumir i a azucrinar la cabeça als diretores de ls agrupamientos i scolas de las outras Beiras i de l Minho.
Ambora a mi me dé grande gusto fazé-lo, cuitados deilhes!… Que muitos tubíran yá, i alguns outros tenerán inda que tener, pacéncia subreciente pa me star a aturar!… Cumoquiera que, nin que seia solo culs sous botones, dirán mesmo alguns deilhes: mas que raio de mal tenerei you feito a Dius para isto me tener tocado i este me haber salido na rifa?!…
Bocabulairo/vocabulário
Acá – cá / als – aos / anté – até / amanaça – ameaça / anque – ainda que, embora / anterruçon – interrupção / anzonice – enzonice, coisa sem valor / azucrinar – apoquentar / beç – vez / berdade – verdade / bós – vós / boton – botão / buona – boa / cachico – pouquito / çafar – livrar / çcansado – descansado / causo – caso / çfrente – diferente / çtrito – distrito / cul – com o / cumoquiera – talvez / cunsumir – cansar / cuntinar – continuar / deilhes – deles / Dius – Deus / dezir – dizer / eilhi – ali / eiqui – aqui / ende – aí / lhebar – levar / loinje – longe / ls – os / malo – doente / mirai qu’oulhai que – vejam bem / miu – meu / mos – nos / nun – não / paiç – país / porbíncia – província / pori – talvez / pula – pela / quien – quem / rezon – razão / rezonable – razoável, racional / salir – sair / scola – escola / screbir – escrever / sembrar – semear / solo – apenas, só / splicaçon – explicação / star – estar / Stremadura – província da Estremadura / subreciente – suficiente / tan – tão / tener – ter / tiu – tio, senhor / tocar – calhar / tubíran – (forma do verbo “tener”) tiveram / ũa – uma / ye – (forma do verbo ser) é / yá – já / you – eu
Para saber o significado de outras palavras, sugiro a consulta do sítio
Angueira 