A las mies amigas i ls mius amigos que ténen la curaige de se botáren a ler ls mius testos, que mais nun son que las memórias de la mie anfáncia an Angueira, pula pacéncia cun que me teneis stado a aturar, tengo, oumenos, que bos dezir:

Oubrigado!

Inda agora, quedando para trás l outonho, antremos ne l eimbierno i stamos yá ne l Natal. Tengo, anton, que bos dezir ũa cousa:

Buonas Fiestas!

L anho bielho stá quaije a ir-se ambora i, cula mesma priessa cun qu’el se bai scapando, l anho nuobo stá quaije mesmo a chegar.

Debido a la pandemie, l anho de 2020 fui ũa zgrácia pa l mundo i pa todo-mundo. Assi i todo, oumenos, ũa cousa tubo de buono: ls amaricanos mandórun la “trumpa” – que, ne ls derradeiros quatro anhos, ls Stados Ounidos i nós tamien tubimus q’aturar – pa l sítio deilha. Até qu’einfin!… Que quatro anhos yá bonda, se nun son mesmo de sobra… Assi i todo, eimitando i amostrando ser tan “republicano” i “democrata” cumo Bokassa i Idi Amin, l aldrabon, parcendo nun se dar bien cula aritmética, cun mais de siete milhones de botos a menos que l Persidente eileito, inda anda por ende a refilar i, cumo se fússemos chabasquitos, a querer cumbencir-mos de que, se nun fusse ũa “fraude gigantesca”, el ye que serie l legítimo bincedor de las eileiçones! I, se calha, será capaç de tener algũa rezon. Ye que, sigundo, nũa tarde destas, oubi nas nobidades dun de ls canales de telbison, la “fraude gigantesca” fui dun amaricano, cumoquiera mui grande, que, an beç dũa sue tie que s’habie morrido, botou ne l “trumpolineiro”. I nun ye q’alguns amaricanos, cumoquiera de la mesma témpera del, inda acredítan ne l scalabrés!… I nun ten eimenda!… Campion de las ambenciones i de las aldrabices, quien oubir l çacana dirá mesmo q’acredita neilhas. Para mais, l presunçoso cuida que todo roda a la buolta del i de l sou ambelhigo.

Tamien por bias de la çcubierta ou criaçon de la bacina, tenemos agora la spráncia que, acabando de beç l suonho malo deste anho, 2021 seia bien melhor que 2020. Tengo, anton, que bos desear inda outra cousa mais:

Feliç 2021! Que, spertando deste suonho malo que fui 2020, todo-mundo tenga un Anho Nuobo de-lei!

Un abraço a todas i todos i a cada ũa i un de bós.

Se quegirdes quedar a saber un cachico mais subre Angueira, podeis ir até lhá i/ou pedir la buossa adeson a “Angueira Atalaia”:

Angueira cunBida!