Pulas Tierras de Miranda (an Mirandés)

Tengo q’agradecer al amigo David Ferreira l cumbite, que, an jeito de zafiu i an representaçon de l Mobimiento Cultural de la Tierra de Miranda, a quien tengo q’agradecer tamien l’amablidade, me fizo pa screbir un testo an Mirandés. Esta ye la rezon de tener screbido Pulas Tierras de Miranda, que, pa lhá dũa bejita (birtual) guiada al Praino, ye tamien ũa maneira d’houmenagear las/ls mirandesas/es que quegírun i soubírun cunserbar la sue cultura: la Lhéngua i ls sous modos de ser, de bibir, de trabalhar, de se bestir, de cumbibir i de se debertíren. Ne l final de cuontas, cunseguírun pus anton mantener la sue eidentidade cultural que, nin l cura na eigreija, l/a porsor/a na scola ou qualquiera de las outras formas de presson social que l’armórun a la sue buolta, habíen de cunseguir cuntrariar, apagar ou fazer sbarrulhar.

Cumbido-bos a, pul meio de junho, acumpanhar l bolo dũa palumbica – se calha tamien a la porcura de par –, pul Praino Mirandés. Fazei anton de counta qu’eilha ye l buosso “drone”.

Purmanhana, inda antes del Sol ampeçar a raiar i de se poner a camino, que ye cumo quien diç, de se botar a bolar de l palombar, cumo la mai nun se cansaba de l’acunselhar, la palumbica toma las debidas precauçones. Ye que, cumo s’oube por ende dezir, quien ten culo ten miedo. Ponendo-se, aton, a spreitar bien l cielo pa todos ls lhados, daba ares que l die iba a star claro i, cumoquiera por ser inda cedo, tamien nun se bie modo d’andar por eilhi a bolar ningũa abe de rapinha, subretodo l’águila ou l gabilan.

De l pobo d’Uba, cerca da donde ls lhemites de ls cunceilhos de Bumioso, Mogadouro i Miranda se tócan, bate las alas, ribeira d’Angueira arriba, caras a nordeste. Por poboaçones de Bumioso, mas cerca d’outras de l cunceilho de Miranda – Fuonte Lhadron, Granja, San Pedro de la Silba –, alhá bai eilha: d’Uba para Bila Chana de la Ribeira, puls Picadeiros, la Terronha i la marra antre ls termos de Caçareilhos i de la Bila, subrebolando l termo i las poboaçones de San Joanico i de Çarapicos, inda mal habie nacido l Sol, mudando de direçon, purmeiro, para sudeste i, lhougo apuis, pa naciente, bai a dar al termo d’Angueira. Pula fraga d’Águila, a meia barreira de la Gralheira i passando al lhado de l cabeço de la Quecolha, nistantico, bai a dar al Múrio, un penedo a pique, quaije pegado a la ribeira i al lhado de la poboaçon. Abistando la fuonte a meia barreira, pousa pa buer un trago d’auga i anchir c’ũas semientes. Si, que, cumo qualquiera drone, tamien eilha ten que recargar bateries! I, pa çcansar las alas, bota-se a caminar até al cimo de l monte, adonde para un cachico a la selombra dũa touça i aporbeita tamien pa mirar las bistas de la poboaçon.

Claro que, quando bolaba subre la Fuonte Santa, biu la auga a borbulhar na naciente un cachico amarielha. Cheirando-le tamien a anxofre, nun le pareciu ser grande cousa pa se buer. Mas, cumoquiera stubisse anganhada, pus dízen que fai mui bien al cuorpo, por drento i por fuora.

Angueira: Molino de las Trés Ruodas ou de ls Lucas an Terroso. Pa lhá de la çuda i de la caliendra, ten inda la casa de l molineiro.

Cuntinando a bolar, ribeira arriba, pula Cabada, la Senhora, Ourrieta Caliente, la Yedra, Terroso i antre l Castro i l Juncal, bai a dar al Gago, adonde las marras márcan q’acában l termo d’Angueira i l cunceilho de Bumioso i ampéçan ls de Samartino i de la Speciosa i l cunceilho de Miranda. De seguida, subrebolando l termo i l pobo de Samartino, bai até la raia, al sítio adonde la ribeira, benida d’Alcanhiças an Spanha, entra an Pertual.

D’Uba até la raia, de l aire, biu que todas las poboaçones que subrebolou ténen bários palombares, corriças, molinos, casas de molineiro, çudas, caliendras i algũas deilhas tamien pison – quaije todos abandonados ou a amanaçar rúina –, puontes i puntones, huortas, lhameiros/as, beigas i ribeiros, cumo tamien carbalhos, freznos, amineiros i choupos a la farta i inda algũas carrasqueiras i uolmeiras. Zafertunadamente, yá nun puodo ber ls uolmos de grande porte i tuoro cun muitas trapolas. Éran tan fuortes i tan altos que quaije parecie andáren al zafiu culs choupos a ber quales deilhes serien las arbles mais altas que, dantes, habie por estes lhados. Mas, a seguir al zastre de Chernobyl i, cumo tal, hai bien anhos, tenien secado todos. Pa lhá de ls cochinos, que quedórun sin fuolha nas caldeiradas, quien pagou tamien fui la ciguonha que, por bias disso, quedou sin nial.

Pa lhá d’abistar algũas pessonas ne ls caminos, burros i buiadas ne ls lhameiros i un ou outro ganado por tierras ou montes de l termo, la palumbica nun se cansa de çcuitar la çarabanda daqueilha ourquestra sinfónica de tantos i bárias speces de páixaros a chilrar, cada qual a la sue maneira, mas todos al mesmo tiempo, nas marges de la ribeira.

L ribeiro de ls Milanos ne l ampercípio de la primabera i cerca de la Retuorta i de la Yedra adonde bai desaugar na ribeira d’Angueira. Retrato de la amiga Fátima Malheiro a quien agradeço por me tener outorizado a publicá-lo.

Subrebolando apuis ls montes de la raia al lhado de Cicuiro, antes de la poboaçon, abista aqueilha capielha branca que, cul sou campanairo de piedra, quaije parece ũa eigreija. A seguir, pul lado de l pobo de Costantin, chega al monte i a la capielha de la Senhora de la Lhuç. Apuis de plainar un cachico ne l aire, deixando para trás la raia, sbolaça pa l Naso. Inda nin serie meia manhana quando pousa na cruç de l campanairo de la eigreija de l santuairo. Deilhi, ampeça, anton, a oulhar alredor.

Bistas de cerca de l santuairo de l Naso caras a poniente: poboaçon de la Speciosa, sierros i cabeços d’Angueira, sierra d’Abelhanoso i montes de Bal de Frades i Bal de Pena por donde passa la raia; alhá lonje, de la squierda pa la dreita, las sierras de Bornes, Nogueira i Muntesino i, atrás i al lhado desta, la sierra de Senábria, yá an Spanha.

De naciente a poniente, ne l sentido de ls punteiros de l reloijo, acumpanha l arco dezenhado pul Sol. Al lonje, mirando la tierra i pa l cielo, inche ls uolhos i la alma c’ũa paleta de quelores, que, de berde, bai bariando para amarielho, dourado i castanho, i d’azul, para cinzento i branco. De lonje a lonje, abista algũas poboaçones.

Oulhando pa naciente, pa trás de la Pruoba i de Anfainç até Paradela, l sítio adonde purmeiro ampeça a dar l Sol an Pertual, arregalando ls uolhos, acumpanha las Arribas de l Douro, que, tanto de l lhado de Pertual cumo de l de Spanha i antes i apuis de la cidade de Miranda, scónden l riu i las sues barraiges.

Binócalos, para quei? Que, nun sendo niũa pita-ciega, nin deilhes percisa. Bonda-le fazer “zoom” culs uolhos i yá stá. Assi i todo, deilhi, nun cunsigue alcançar niun miraDouro, nin la cidade de Miranda, nin las binhas, nin mesmo las poboaçones, que, ũas para cá i outras pa lhá de la cidade, quédan cerca de las Arribas.

Para sul, dá de caras cun aquel lhençol praino, quaije sin angúrrias, que, zde l fondo de ls montes por donde, mesmo eilhi al lhado, passa la raia i que, de las Arribas, antes i apuis de Miranda, se stende até alhá al fondo de ls montes i sierras de Mogadouro i de Macedo.

Caras a poniente, mais al lonje, la lhina d’hourizonte dezenhada pulas sierras de Nogueira i de Muntesino i, atrás i al lhado desta, pula de Senábria, yá an Spanha. Abaixando pa la cidade de Bergáncia i passeando ls uolhos pul castielho i puls montes que tápan ls rius Sabor i Maçanas, bei las prainas antre ls cabeços i ls castielhos d’Outeiro, d’Algoso i de Peinhas Roias. Nas prainas que quédan de cada lhado de ls montes por donde, al fondo, cuorre l riu Maçanas, abista, pa lhá de l riu i mais lonje, las minas, la capielha de San Bartolomeu i la bila d’Argoselo i inda las poboaçones de Carçon i Santulhan, quedando la Matela, Junqueira i Abinhó scundidas atrás de ls montes; para cá i mais cerca, las poboaçones de Pinelo, Campo de Bíboras i d’Algoso, quedando Bal d’Algoso scundido nun balhe; i, al meio i antre todas estas, la Bila (Bumioso).

Paisaiges i lhina d’hourizonte ne l termo de Santulhan caras a poniente. Retrato partelhado por David Lopes an “Santulhão Atalaia” a quien tengo que l’agradecer por me tener outorizado a publicá-lo.

Apuntando ls uolhos para norte, repara, apuis, ne ls montes por donde passa la raia, que, de Bal de Pena i Bal de Frades, cuntinando pula sierra d’Abelhanoso, bai a dar a la frunteira de las Trés Marras. Inda mais cerca, perfílan-se ls sierros i cabeços d’Angueira por donde, cumo biu de manhana, al fondo i antre eilhes, cuorre la ribeira; a la squierda deilhes, l termo i las poboaçones de Caçareilhos, Bilasseco i Zenízio; i, inda mais cerca, mesmo a la frente de ls uolhos, la poboaçon i l termo de la Speciosa.

Yá qu’eiqui stá, çcansou un cachico i inda ye cedo, para ber melhor i an mais pormenor l Praino, apunta l bico i ala pa Miranda. Antre ls termos de Malhadas, dun lhado, de la Pruoba i d’Anfainç, d’outro, para un cachico nũa senara de trigo i bota-se a anchir l papo c’uns granicos. Bola, apuis, para mais abaixo, subre uns lhameiros ne ls dous lhados dun ribeirico. Oubindo ũa squila, repara nũa buiada – mais dũa dúzia de bacas, todas de raça mirandesa, trés ou quatro bitelicos, un bezerro inda mamon i un bui mui cuorpulento i bien guapo – a pascer la yerba mais fresca cerca de l’augueira i alredor de la fuonte. Chena de proua cula sue coleira lharga i de bezerro crabada de dourado a la buolta de l cachaço, la baca q’abana la squila ye de las mais nuobas i la mais galana. I, na borda de la parte mais seca de l lhameiro, cerca de la parede i alredor de ls freznos, nin sequiera fáltan ũa burra i l sou burrico a morder las fróncias dũa freixeira.

Bolando, apuis, al lhado de l Palancar i un cachico antes de Peinha Branca até al riu Frezno, inda bota ls uolhos caras al Douro. Mas, indas que bien le custe, nin pensar an ir até Aldinuoba i inda menos al miraDouro de San Joan de las Arribas, nin mesmo a Bal d’Aila. Para mais, al lonje, mas p’aqueilhes lhados, abista un bando d’abes a plainar, dezenhando bários circlos ne l aire. Se nun dá pa saber se seran abutros ou águilas, dũa cousa queda cula certeza: son abes de rapinha.

Sbolaça, mas ye, riu Frezno abaixo, caras a Miranda. Mal alhá chega, pousa na torre mais alta i sbarrulhada de l castielho. Anquanto çcansa un cachico, pon-se a mirar la cidade: a la squierda, la parte nuoba i, an frente i a la dreita, la parte bielha, drento de las muralhas. Mas que guapa cidade i que bien cuidada que stá!

Nun bolo delgeiro subre l casariu, bai a dar al Lhargo D. Afonso III, al cimo de la Rue de la Costanilha i antre l Museu de las Tierras de Miranda i ls Paços de l Cunceilho. De riba, dá para ber aquel mundo de pessonas qu’eilhi stan i ende se crúzan. Algũas deilhas páran un cachico para apreciar, tirar l retrato ou filmar ls anfeites, ls eidefícios i las státuas de la moça i de l moço, ũa birada pa la outra i ambas a dues an traijes mirandeses.

Rue que bai a dar a la Sé de Miranda. Retrato tirado pula amiga Maria da Luz Fernandes Pires a quien agradeço por me tener outorizado a publicá-la.

Quedando para trás la praça, bai a pousar ne l cata-bento de la torre de la squierda de la Sé. Sentindo-se eilhi bien mais sigura, pon-se anton a ber, caras a norte i a naciente, las Arribas dun lhado i doutro de l riu que passa alhá an baixo i la pousada an riba; de l outro lhado, pousa ls uolhos naqueilha peinha castanha raiada d’amarielho a percepitar-se pa l riu; quaije a la frente i an baixo, la barraige que, pa lhá de porduzir eiletrecidade, dá pa passar de i para Pertual ou Spanha. La palumbica abre la boca – ye cumo quien diç, l bico –, de spanto al ber tantas pessonas, ũas a salir outras a chubir pa l barco i, nabegando riu arriba i, apuis, riu abaixo, bejitar las Arribas i ber, retratar ou filmar ls abutros, águilas i outras abes de rapinha, ls percepícios i aqueilhas bistas zlhumbrantes de las marges de l Douro.

Nun fusse tener qu’ir a mais lhados antes de tornar para casa – ou, dezindo melhor, pa l palombar –, cumoquiera inda quedarie por eilhi pasmada mais ũas horas.

Indas que bien le custasse, mas pa nun assujeitar-se a algun peligro, nin sequiera s’astrebiu a bolar pa las Arribas, nin parriba nin para baixo de Miranda i inda menos pa lhá de l riu. Tubo, assi, de se cuntentar cun oulhar alhá para baixo i an frente pa la barraige i pa la bien coincida peinha de l lhado de lhá de l riu. I, pasmada cul que biu, nun le faltou buntade de spreitar tamien la Sé por drento, specialmente, l Nino Jasus de la Cartolica. Mas, stando muitas pessonas a la puorta, cula buntade se queda. Assi i todo, inda bota ls uolhos naqueilha arcada que, an tiempos, era la parte de baixo de l paço de l bispo.

Inda le faltaba bien que ber na cidade i a la buolta, mas, passante yá de mei-die, habie que cuntinar a bolar pa bejitar i ber inda tanta cousa mais…

Aton, cun Bal de Mira, a la dreita, bola subre Cércio i, de seguida, antre Freixenosa a la squierda i Dues Eigreijas a la dreita, caras a Picuote.

Abistar Dues Eigreijas lhembrou-le d’oubir dezir qu’era lhá que, dantes, las pessonas apanhában l camboio. Mas, agora, passados yá quaije quarenta anhos, nin camboio nin mesmo lhina hai pa l apanhar. I, s’inda alhá stá la staçon ye solo porque nun la cunseguíran tirar! Assi, que remédio ten senó cuntinar a bolar. Bá lá que, oumenos assi, le dá para apreciar melhor las bistas dun lhado i doutro da donde passar.

Apuis, sbolaçando pul lhado de l pobo de Bila Chana de la Barceosa i cun Fuonte Aldé a la dreita, toca pa Picuote i, da peto, bai a dar al miraDouro de la Fraga de l Puio.

Stá bien de ber que tubo q’andar – ou, dezindo talbeç melhor, bolar – d’uolho bien listo i cun todo l cuidado, nun fusse, pori, ũa águila ou algun gabilán atirar-ser a eilha i botar-le las garras. Mas, baliu bien la pena arriscar-se un cachico, pus las bistas daquel percepício pa l riu, de la barraige, dun lhado i outro de las Arribas, de l termo i de la poboaçon de Picuote i de l Barrocal – mesmo culas casas de ls angenheiros eilhi al abandono i tan mal cuidadas que ye ũa pena –, son mesmo de cortar la respiraçon, d’arregalar bien ls uolhos i d’anchir la alma! Quaije parece que la natureza i l home se dórun las manos para mos deixáren aqueilha marabilha!

Cuntinando, apuis, a bolar pul termo, porriba dalgũas binhas i trigueiras, bai a dar a la bila de Sendin. Fusse eilha giente i, cumoquiera, tal cumo las pessonas qu’eilhi se béien, ũas a la puorta i outras alhá drento de l restourante, tamien nun passarie sin regalar-se a quemer la posta na Gabriela.

De Sendin, cun Ruolos a la dreita, bola pa la bairraige de Bempuosta. Mais ũa beç, queda spantada cu’aqueilhas bistas i poboaçones. Só le dá pena de ber, cumo tamien tenie bido na lhadeira que, de las muralhas de l castielho dá pa la barraige de Miranda, aqueilha bergonha de danho al ambiente i de peligro pa las pessonas, deribados de las pedreiras a cielo abierto que, na barreira de l lhado d’acá, eilhi deixórun ls respunsables pula costrucion i, mais tarde, pula administraçon de las barraiges.

Inda le passou pula cabeça botar-se até Mogadouro. Mas, cumo yá nun darie tiempo i inda ten pula frente ũa buona caminada – que ye cumo quien diç, un grande bolo que dar –, muda d’eideia. Assi, la bejita a Mogadouro i a la maior parte de las poboaçones de l cunceilho tenerá que quedar para outro die.

Aton, ala que se fai tarde. Passante yá de meia-tarde, cul Sol a dar-le quaije de frente, bola pul termo de Bempuosta i apuis pul de Ruolos, adonde abista las rúinas dũa capielha mui antiga, mas bien guapa i aquel balhe adonde algũas pessonas d’alhá ténen las sues bodegas. Yá na parte mais alta de l termo, cuntinando por antre Trabanca i Sendin i apuis al lhado de Saldanha, l mais a dreito i delgeira que puode, bola pa l’Atenor. Tanto de l lhado de Miranda cumo de l de Mogadouro, abista paisages eiguales: binhas, pomares, alguns lhameiros, tierras de arada i trigueiras que, dun berde desbotado, stan a mudar pa dourado. De seguida, cun Prado Gaton a la dreita, por antre Teixeira e Palaçuolo i, apuis al lhado de Mora i cun Fuonte Lhadron a la dreita, abista al lonje ls termos i las poboaçones d’Augas Bibas, Saldanha, Algoso i l sou guapo castielho subre aquel percepício pindurado subre la ribeira d’Angueira i inda la torre de l castielo de Peinhas Roias.

Claro stá que yá nun abista tantas senaras cumo ls sous abós le dezien haber dantes, quando las trigueiras i las aradas acupában la maior parte de las tierras de fabrico de l Praino. Mas, sendo fin de tarde, tal cumo antigamente, abista tamien ganados zamurrados a salir de l steio i a camino dalgun ribeiro i buiadas a camino de casa. Se las canhonas, yá çquiladas, síguen, ũas coladas às outras, atrás de l pastor, ye l buieiro que, atrás de la fila de bacas, sigue la buiada.

Stá yá l Sol a çponer-se quando la palumbica chega al sou palombar an Uba. Stafadica de todo, cumo s’oube por ende dezir, cumoquiera dirá tamien eilha culs sous botones: “Só m’apetece caldo i palheiro!”

Assi i todo, dou tamien para ber de riba, ls termos i abistar las poboaçones d’Augas Bibas, Saldanha, Algoso i l sou marabilhoso castielho, an riba daquel fragaredo, un precepício pindurado subre la ribeira d’Angueira.

Fui ũa pena que, desta beç, nun tenga dado tiempo pa passar i parar, oumenos un cachico, an Palaçuolo. Mas, cumo esta poboaçon nun queda lonje d’Uba, un die destes há de dar un bolo até lhá, aporbeitando, assi, pa bejitar la poboaçon i ber las fábricas de nabalhas i de pipas i l mosteiro de las freiras eitalianas. I, cumo quédan pul camino, quien sabe se, na ida ou na buolta, nun aporbeitará tamien para ber las minas de Santo Adrion i bejitar las poboaçones de San Pedro de la Silba, Bilasseco, Caçareilhos, Zenízio, Augas Bibas, Granja, Prado Gatón i, até mesmo, Dues Eigreijas.

Cumo qualquiera poboaçon, tamien cada pessona ye cumo ye, defrente de las demais. Mesmo para quien nun saba ler nin screbir, la bida ye cumo un lhibrico adonde, die a die, bai assentando mais un cachico de la sue. La maior parte de las pessonas de l Praino i alredores fúrun-la screbindo na Lhéngua que, an casa, cula sue parentela, i, ne l pobo, culs bezinos i amigos, daprendírun i afazírun-se a falar: l Mirandés. Assi i todo, cul cura na eigreija, l/a porsor/a na scola, cun la giente fidalga i las pessonas de fuora que falában la outra nuossa Lhéngua, daprendírun tamien a falar grabe: l Pertués.

Hai cerca de dous seclos, ls cunceilhos bezinos de Miranda, Mogadouro i Bumioso quedórun cun las poboaçones que ténen hoije, mantenendo cada qual alguns traços que ls çtínguen. Mas, fazendo todos trés parte de la Tierra de Miranda, aparte las defréncias, las sues gientes sínten proua de la eidentidade que les dá partilháren ũa cultura quemun: ls modos de falar, de ser, de bibir, de trabalhar i de se debertíren. Ye que, nas feiras i fiestas de la Lhuç, de l Naso, de ls Grazes, de Caçareilhos, las pessonas de Miranda, de Mogadouro i de Bumioso cuntinórun a cumbibir i a festejar ũas culas outras.

Inda antes de Pertual nacer i, bien seclos apuis, las gientes de Miranda, de Mogadouro i de Bumioso assentában-se a la mesma mesa, quemíen de l mesmo caldo, cozinado culs mesmos angredientes i temperos i al lhume ne l mesmo pote cultural. Assi i todo, las cuntinuidades territorial, social i cultural nun ampedírun la amposiçon dũa çcuntinuidade política i administratiba benida de fuora. Hai cerca de dous seclos, la stablizaçon de las poboaçones que, até hoije, son parte de cada un de ls cunceilhos fizo oumentar alguns de ls traços que, agora, ls defrencían. Mas, las sues gientes cuntinórun a ancuntrar-se, a cumbibir, a festiar i a celebrar an quemun nas feiras i fiestas de la Lhuç, de l Naso, de Malhadas, de ls Grazes, de Caçareilhos, de Miranda, de Mogadouro i de Bumioso. Indas que téngan las sues defréncias, fazendo cada un de ls cunceilhos parte de las Tierras de Miranda, las sues gientes son sensibles al apelo a la sue (re)aprossimaçon. Ye que, zde inda antes de Pertual eisistir, partílhan las mesmas eidentidade i matriç cultural: ls modos de falar, de ser, de (cum)bibir, de trabalhar e de se debertíren. Pa lhá disso, sínten eidénticos porblemas, specialmente, ls efeitos de la almorragie de la populaçon deribada de la grande salida, que, zde l ampercípio de ls anhos 60 de l seclo passado, zbaziou de giente las poboaçones que deilhes fázen parte, ne l definamiento de la atibidade eiconómica i ne l ambelhecimiento de la populaçon que, rejistindo a todo, neilhas cuntina inda a bibir. Amanaçando cumpormeter l própio mantenimento de cada un de ls trés cunceilhos, ye normal que, juntamente, porcúren ancuntrar soluçon par’estes porblemas.

Chegou la hora de, an beç de cuntináren de cuostas biradas i cada qual a oulhar pa l sou ambelhigo, ls trés cunceilhos dáren las manos. Indas que téngan algũas defréncias, ye bien mais l que les puode ounir que l q’aparta las poboaçones i las gientes de las Tierras de Miranda.

Parque de las Merendas na Cabada d’Angueira. Ne ls sábados i deimingos de berano, ne ls anhos 50 i 60 de l seclo passado, ls barragistas questumában parar eiqui pa la pescarie, a caçar carangueijos, i pa nadar, refrescar-se i çcansar.

A la purmeira bista, la criaçon de l Mobimiento Cultural de la(s) Tierra(s) de Miranda tubo que ber culas barraiges. A respeito destas, deixai que bos lhembre dũa cousa: ne ls anhos 50 i 60 de l seclo passado, era you garotico, de manhana a la tarde de ls sábados i deimingos de berano, nas baletas de la strada antre la Cabada i la eigreija i nas bordas de l camino de la Çanca pa ls Puntones, bien-se tantos carros legeiros… Éran de ls barragistas que, culs sous fameliares, íban, da peto, a Angueira pa la pescarie, pa caçar carangueijos, i pa nadar, refrescar-se i çcansar nas selombras de las marges de la ribeira. Cumoquiera, tenerá sido nessa altura que, pula purmeira beç, oubi dezir als barragistas: “Bota pa la barraige de Miranda que la de Picuote yá nun anda!..Bota p’rá barragem de Miranda que a de Picote já não anda!…”

Mas la criaçon de l Mobimiento Cultural de la(s) Tierra(s) de Miranda nun tubo solo que ber culas barraiges de Miranda, Picuote i Bempuosta, cumo la criaçon de la Rede Atalaia tamien nun tubo solo a ber cula fraca partecipaçon de las pessonas de l cunceilho de Bumioso nas eileiçones. Cumoquiera la criaçon d’ambos a dous tubo mais a ber cula necidade de, quanto antes, ajudar a criar las cundiçones pa tornar a dar bida a las Tierras de Miranda, a las poboaçones de ls cunceilhos de Miranda, Mogadouro i de Bumioso.

Ls porblemas de las Tierras de Miranda, cumo, se nó de todas, oumenos de la maior parte de las tierras de l Nordeste Trasmuntano i até mesmo de todo l Anterior de l Paíç, nun sendo solo d’hoije, bénen yá de mais atrás. Bonda lhembrar l que, apuis de ls cónigos de la Sé i corridos dous anhos subre l cerco de la cidade, an 1764, nun fuora de bulgar i stordinairo ato de “curaige” i “brabura”, Don Frei de Miranda Henriques, l 23.º i redadeiro bispo de Miranda, les fizo: abandonou la cidade i scapou-se pa Bergáncia. Un rico eisemplo que – cumo, zde l seclo passado até hoije, l pobo de las Tierras de Miranda stá cansado de ber – nun habie de quedar sin seguidores: ls gobernantes de Pertual que mais parece andáren a eimitar este bispo.

A ber se, desta beç, l pobo de las Tierras de Miranda s’alhebanta i nun se cuntenta cun, an pagas i pa que naide de Miranda se squeça, grabar na piedra de la tumba de l bispo: “Aleixo, bispo indigno (…) 1764”. Si, que, cumo screbiu l soudoso i eilustre mirandés Amadeu Ferreira i ls Galandum Galundaina tan bien cántan, “ESTA MALTA NUN ARREDA!”

Se quegirdes ber la traduçon deste testo para Pertués, bonda cargardes na lhigaçon: https://angueira.net/2021/05/05/pelas-terras-de-miranda-versao-em-portugues/

5 comentários sobre “Pulas Tierras de Miranda (an Mirandés)

  1. Parabéns.
    Dizemos lhameiros ou cerrados?
    Em Malhadas dizer lhameiros já é falar grave.
    O saudoso é grande Amadeu tb deixou esta necessidade de não nos quedar.
    Arriba!

    Curtir

    1. Caro José Pires, obrigado. É verdade que, neste caso, sendo o lameiro todo murado, se podia, com toda a propriedade, escrever “cerrado”. Mas, embora raros, também havia lameiros que não eram, pelo menos totalmente, cercados por paredes. Contudo, em Angueira, dizia-se sempre “lhameiro” e, às pequenas propriedades em que a erva – azevém ou trevo – era de cultivo, dava-se-lhes o nome de “lhameiras”.

      Curtir

      1. Engraçado o detalhe. Lhameiras, no condado de Malhadas são terrenos franqueados, locais de enxurradas e onde as vacas pastavam. Havia um ditado popular que se aplicava ao goieiro destas terras quando as vacas iam para estas lhameiras:não te sentes, quem se senta deita-se e quem se deita dorme e quem morde deixa comer o cereal ao vizinho confinante. Havia uma outra particularidade nestas Lhameiras. Tinham muitos gamones e eram estas moiteiras o local indicado para os cochichos fazerem o nial. Como diz o meu vizinho, com os IC’s qualquer um vem aqui parar e nada é como dantes.

        Curtir

Deixe um comentário

Preencha os seus dados abaixo ou clique em um ícone para log in:

Logotipo do WordPress.com

Você está comentando utilizando sua conta WordPress.com. Sair /  Alterar )

Foto do Google

Você está comentando utilizando sua conta Google. Sair /  Alterar )

Imagem do Twitter

Você está comentando utilizando sua conta Twitter. Sair /  Alterar )

Foto do Facebook

Você está comentando utilizando sua conta Facebook. Sair /  Alterar )

Conectando a %s