Cumo teneis bido, caras/os amigas/os, este anho, a la purmeira bista, puodo dar la eideia q’ando cun cachico de perguícia. Mas, puodeis crer que nun ye bien assi… Ando, mas ye, cun falta de tiempo, l que me ten ampedido de fazer alguas cousas que bien gostaba de cuntinar a fazer cun mais afinco.

Bárias rezones ténen cunduzido a essa falta de tiempo: las oubricas na casica d’Angueira, que ye tan pequerrica que mais parece ser de brincar ou de monhecas; cumo, ambora nun pareça, hai quaije 50 anhos que sou bien docico. Assi, tengo la necidade de caminar cerca dua hora i meia por die pula cidade de Braga i, quando stou an Angueira, pul sou termo pa tirar retratos de las sues huortas, lhameiros, ribeira, ribeiros, campos de cultibo, caminhos, cabeços, piedras, fragas i peinhas, balhes, puontes, çudas, molinos, corriças, paredes, casas de bibir, para ber se cunsigo quedar un cachico mais amargo; outros trabalhicos de rebison de testos que me ténen pedido pa fazer; cuntinar a admenistrar las 22 páiginas de ls grupos – un por cada poboaçon de l cunceilho de Bumioso – de la Rede Atalaia CumBida; outros porblemas de salude que mos ban batendo a la puorta… Anfin, quien ye que nun sabe cumo, hoije an die, la bida ye?!

Cuntino a tener alguas eideias na cabeça que gostarie de la screbir i eiqui publicar. A ber se, a partir d’agora, amanho un cachico mais de tiempo çponible pa screbir outros testos subre Angueira, las sues pessonas i famílias, las festibidades i outras manifestaçones culturales.

A ber bamos, cumo por alhá se diç que dízen ls ciegos…