(Traduçon pa Mirandés de l “Cântico Negro” de “José Régio”)

“Ben por eiqui” — dízen-me alguns cun uolhos doces,

Stendendo-me ls braços, i siguros

De que serie buono q’you les scuitasse

Quando me dízen: “ben por eiqui”!

You olho-los cun uolhos fadigados,

(Hai, ne ls mius uolhos, ironias i cansaços)

I cruzo ls braços,

I nunca bou por eilhi…

La mie glória ye esta:

Criar desoumanidade!

Nun acumpanhar a naide.

— Que you bibo cul mesmo sin-buntade

Cun que rasguei l bentre a mie Mai.

Nó, nun bou por ende! Só bou por donde

Me lhieban mius própios passos…

S’al que busco saber ningun de bós responde,

Por que me repetis: “ben por eiqui”?

Antes quiero resbalar ne ls caleijos lhamacentos,

Remolinar als bentos,

Cumo farrapos, arrastrar ls pies sangrentos,

A ir por ende…

Se bin al mundo, fui

Solo pa çflorar florestas birges,

I zenhar mius própios pies na arena inda nun splorada!

L mais que fago nun bal nada.

Cumo, pus, sereis bós

Que me dareis upas, ferramientas i coraige

Para you birar ls mius oustáculos?…

Cuorre, nas buossas benas, sangre bielho de ls abós,

I bós amais l que ye fácel!

You amo l Lonje i la Miraige,

Amo ls abismos, las torrientes, ls zertos…

Ide! Teneis stradas,

Teneis jardines, teneis canteiros,

Teneis pátrias, teneis telhados,

E teneis reglas, i tratados, i filósofos, i sábios.

You tengo la mie Tontura!

Lhebanto-la, cumo un fachuco, a arder na nuite scura,

I sinto scuma, i sangre, i cánticos ne ls lábios…

Dius i l Diabo ye que guían, mais naide!

Todos tubírun pai, todos tubírun mai;

Mas you, que nunca ampeço nin acabo,

Naci de l amor q’hai antre Dius i l Diabo.

Ah, que naide me dé piadosas antenciones!

Naide me pida defeniçones!

Naide me diga: “ben por eiqui”!

La mie bida ye ua bentaneira que se soltou.

Ye ua óndia que se lhebantou.

Ye un átimo a mais que s’animou…

Nun sei por donde bou,

Nun sei pa donde bou,

— Sei que nun bou por ende!

José Régio, Poemas de Deus e do Diabo, Portugália Editora, Lisboa, 1969, pp. 57-59