Nota Prévia: uma prevenção

Se o/a leitor/a não está familiarizado/a com a Língua Mirandesa, sugiro que, para facilitar a compreensão do texto, o leia a meia-voz. Se, mesmo assim, sentir qualquer dificuldade em compreender o sentido ou descobrir o significado de alguma palavra menos usual ou cuja grafia se afasta mais da portuguesa, não hesite em consultar o Vocabulário que pode encontrar no final do mesmo.

Breves notas sobre a grafia do Mirandês

Em Mirandês, não se pronuncia o som v, que é substituído pelo da letra b; usualmente, o prefixo des é substituído, consoante os casos, por ç ou z no início da palavra; para não se confundir com a contração da preposição a com o artigo definido o, que, em Mirandês, se escreve e lê al, o artigo definido o escreve-se l, mas lê-se também al; salvo raras exceções, os ditongos nasais ão e õe escrevem-se an e on; o m final das palavras portuguesas é, no Mirandês, substituído pela letra n; geralmente, o l inicial das palavras é substituído pelo dígrafo lh; já o dígrafo ch, em Mirandês, lê-se sempre tch; talvez por, inicialmente, ser apenas uma língua falada, o Mirandês tende a contrair os pronomes, artigos, preposições e as conjunções com as palavras seguintes, quando estas são iniciadas por vogal.

Bede solo pa l que, desta feita, m’habie de dar pa fazer: botar-me a reculhir, tratar i a cumparar ls resultados de las botaçones nas Eileiçones Legislatibas de 30 de janeiro de 2022 nas Fraguesies/Ounion de Freguesies (OF) de ls munecípios de Bumioso, Miranda de l Douro i Mogadouro, ls trés cunceilhos de la Tierra de Miranda.

Antes de mais, tengo q’agradecer a l’amiga Teresa Amparo Ferreira, quadro suprior de l Anstituto Nacional de Statística, por me tener alertado para ũa falha q’habie nũa de las quelunas de l quadro abaixo. Corregida la falha, tengo tamien que bos lhembrar dũa cousa: cada qual bei l mundo de la quelor de las lhientes de ls ócalos, que, pula bida fuora, fui deixando poner i ponendo ne ls uolhos, i que l’ajúdan a ber l mundo.

Nun sendo nin mais nin menos que naide, tamien cumigo se passa la mesma cousa. Assi, pa que nun digades, pori, que bos quiero anganhar, tengo, anton, que bos prebenir que ye culs mius ócalos que beio l mundo.

1. Legislatibas 2022: las botaçones de ls partidos ne ls cunceilhos de la Tierra de Miranda

Mirai l quadro a seguir q’amostra ls resultados de ls partidos nas Eleiçones Legislatibas de 30 de janeiro de 2022 na Tierra de Miranda.

LEGISLATIBAS 2022: MORADORES, ANSCRITOS, ABSTENÇONES, BOTANTES I BOTOS NE LS PARTIDOS POR FRAGUESIE/OF I CUNCEILHO DE LA TIERRA DE MIRANDA

Nun sei porquei, ls resultados de la maior parte de las Fraguesies i OF de Bumioso, Miranda de l Douro i de Mogadouro son çfrentes de ls de la maior parte de ls outros cunceilhos de l Destrito de Bregáncia i de l Paiç.

Indas que, sendo xordos i mudos, i cumo tal nun fálen, berdade berdadica ye que ls númaros tamien mos dízen cousas. Bonda reparar bien neilhes. Cumo podeis ber puls númaros de botos de l quadro, hai muitas cousas mui parcidas ne ls trés cunceilhos:

1.1. Al cuntrairo de l que se passou na maior parte de l Paíç, an todos ls cunceilhos de la Tierra de Miranda tubo mais botos i ganhou l PSD;

1.2. Son pouquitas Fraguesies/OF de cada un de ls cunceilhos an que l PS tubo mais botos i cumo tal ganhou: dues an dieç – las bilas i Fraguesies d’Argozelo i de Bumioso – ne l cunceilho de Bumioso; trés – OF de Costantin i Cicuiro i las Fraguesies de la Pruoba i de Picuote – i un ampate – na Fraguesie de Samartino d’Angueira – an treze ne l cunceilho de Miranda; i dues an binte i ũa – na Fraguesie de Meirinhos i na OF de Vilarinho de Galegos i Ventozelo – ne l cunceilho de Mogadouro;

1.3. De ls partidos a la dreita de l PSD, l CHEGA oumentou cunsiderablemente, subretodo ne l cunceilho de Mogadouro, l númaro de botos; indas que l’Einiciatiba Lhibaral (IL) tenga tamien oumentado l sou númaro i alcançado ne l cunceilho de Bumioso até mais botos q’l CDS, ne ls cunceilhos de Miranda i de Mogadouro, tubo, assi i todo, menos botos q’l CDS, l partido que tubo la sigunda maior perda de botos ne ls trés cunceilhos;

1.4. De ls partidos a la squierda de l PS, l BE i l PCP-PEV, i tamien l PAN – ls dous purmeiros cumoquiera cumo castigo por tenéren botado contra i, assi, nun tenéren deixado passar na botaçon la Propuosta d’Ourçamento de Stado para 2022 apersentada pul Goberno –, cuido you que, talbeç tiemporariamente i por bias de l boto útil, perdírun muitos botos pa l PS; indas q’l Lhibre, tenga perdido botos ne ls cunceilhos de Bumioso i de Mogadouro, assi i todo, cunseguiu oumentar por un l sou númaro de botos ne l cunceilho de Miranda;

Por bias de la alteraçon que la Troika oubrigou a fazer, i l menistro Relvas fizo, nas fraguesies, i tamien por l Anstituto Nacional de Statística i l Menistério de l’Administraçon Anterna apersentáren ls dados de la populaçon i ls resultados de la botaçon por Fraguesie/OF, quedamos sin saber quales fúrun ls resutados de las poboaçones de cada Fraguesie nas Ouniones de Fraguesies. Ye possible que, tal cumo acunteciu an Angueira, haba outras poboaçones ne ls cunceilhos de la Tierra de Miranda adonde ganhou l PS. Pa lhá disso i de ls ampates, hai algũas Fraguesies/OF adonde, quedando ambos a dous reçbéç, l PSD ganhou por ũa unha negra al PS: por un boto an Carção, ne l cunceilho de Bumioso; i, respetibamente, por mais un i dous botos, an Bemposta i an Castelo Branco, ne l cunceilho de Mogadouro.

2. La populaçon i ls Cadernos Eileitorales de ls cunceilhos de la Tierra de Miranda

Olhai agora pal l gráfico G1 cul númaro de Moradores, d’Ancritos ne ls Cadernos Eileitorales, de Botantes i d’Abstençones ne ls cunceilhos i na Tierra de Miranda:

Bendo, cun uolhos de ber, ls dados de l quadro mais atrás i deste gráfico, ls númaros de las Fraguesies/OF i de ls trés cunceilhos nas Legislatibas 2022 amóstran-mos inda mais cousas:

2.1. Eicetuando quatro Fraguesies, dues – Miranda de l Douro i Palaçuolo – ne l cunceilho de Miranda i outras tantas – Bruçó i Vale de Madre – ne l cunceilho de Mogadouro, adonde, sigundo ls Censos 2021, oumentou un cachico l númaro de Moradores, nas restrantes Fraguesies/OF destes cunceilhos i an todas las de l cunceilho de Bumioso, l númaro d’Anscritos ne ls Cadernos Eileitorales ye suprior al de Moradores;

2.2. Oumenos 40 de las 44 Fraguesies/OF de ls trés cunceilhos de la Tierra de Miranda, i todas las de l cunceilho de Bumioso, ténen cuntinado i, se nada demudar, cuntinaran a perder populaçon.

Cumo será possible tan grande çfrença antre l númaro de Moradores i l d’Anscritos ne ls Cadernos Eileitorales? Sendo mais recente i, subretodo, mais rigoroso l processo de recuolha de dados pul Anstituto Nacional de Statística, cuido que ls númaros de ls Censos 2021 staran mais próssimos de la realidade! A este respeito cumbenirá inda sclarecer que, ls númaros de ls Censos dízen respeito a todos ls Moradores de cada Fraguesie/OF i cunceilho, ancluindo ls ninos i adolescentes, que, por nun tenéren inda cumpletado 18 anhos, nun puoden botar i, cumo tal, tamien nun puoden cunstar de ls Cadernos Eileitorales. Assi i todo, l númaro de Moradores de 40 an 44 de las Fraguesies/OF de la Tierra de Miranda, son anfriores als d’Anscritos ne ls Cadernos Eileitorales: Bumioso ten a mais 1 318 Anscritos que Moradores; Miranda de l Douro ten 779 a mais; Mogadouro ten 1 686 a mais; i, assi, la Tierra de Miranda ten a mais 3 783 Anscritos que Moradores. Assi, ls númaros de ls Censos 2021 amóstran-mos tamien que l’abstençon real ne ls cunceilhos de la Tierra de Miranda ten que ser mui anfrior a la mi alta abstençon oufecial.

La queston de la grande çfrença antre l númaro de Moradores i d’Anscritos ne ls Cadernos Eileitorales de cada Fraguesie/OF, nun ye solo d’agora, mas yá mui antiga. Custa mesmo a crer que, culas alteraçones al Recenseamiento Eileitoral, ls nuossos políticos inda nun téngan cunseguido resolber de beç este porblema. Ne l miu modo de ber, de dues ũa: ou ándan todos a drumir na fronha ou hai quien steia antressado nisso, subretodo alguns outarcas a que le dará jeito mantener las cousas cunsante stan. Claro stá q’hai seluçon, ou, até mesmo, bárias seluçones, pa l porblema. A este respeito, deixo eiqui dues perguntas: por que rezon nun fázen la lhigaçon antre Cadernos Eleitorales i ls dados de l Registo Cebil? Se, nas eileiçones, ls cidadanos, deç que téngan las cundiçones eisegidas pa l efeito, se puoden candidatar adonde eilhes ou ls sous partidos políticos quegíren i les dir na gana, por que rezon ls outros cidadanos/eileitores nun puoden, fazendo cumo eilhes, sculher botar na Fraguesie/OF adonde nacírun ou adonde passórun parte de la bida ou inda adonde móran? Oumenos assi, deixando de baler la pena andar a amanhar maneira de, nas Eileiçones Outárquicas, trazer pessonas de loinje, subretodo de l strangeiro, pa botáren na Fraguesia adonde nacírun, las cundiçones quedaríen a ser mais eiguales para todos…

Quanto a la perda de populaçon ou çpoboamiento, hoije, bou a deixar de parte este que ye l maior i percipal porblema de la Tierra de Miranda, de l Nordeste Stramuntano i de l Anterior de l nuosso Paiç. Mas, se nada fur feito, mais anho menos anho, bai acabar cula maior parte de las poboaçones de l Anterior de l Paiç, adonde só restraran yerbascos, mato i piedras. Assumindo cada qual las respunsablidades que les tócan, Goberno i outarcas – si, que tamien a estes nun les falta bien que demudar ne l que ténen andado a fazer! – ténen, anton, que, quanto antes, cuidar d’ancuntrar, acordar i seguir outra stratégia de zambolbimiento, aplicando çfrentes medidas políticas q’ajúden a repoboar i a rebitalizar las poboaçones de l Anterior. Mesmo correspundendo a cerca de dous terços de l território nacional, d’hai muito tiempo até hoije, las poboaçones de l Anterior de l Paíc ténen sido tratadas cumo parientes probes.

3. Botaçones de ls partidos nas Legislatibas 2022 ne ls cunceilhos de la Tierra de Miranda

Olhai agora pa l gráfico G2 q’amostra la soma de botos de ls dous partidos mais botados i de todos ls outros partidos an cada un i ne l cunjunto de ls trés cunceilhos:

Cumo este gráfico amostra l númaro – mas nó la percentaige – de botos, puode gerar algũa cunfuson na cumparaçon antre ls cunceilhos pus puode dar l’eideia de que las percentaiges seran maiores adonde cada queluna ye maior. Mas puode nun ser assi yá que cada queluna ye maior ou mais pequenha cunsante l númaro de Moradores, d’Anscritos i de Botantes de cada cunceilho. Cumo Bumioso ye l cunceilho cun menor númaro i Mogadouro l cunceilho cul maior númaro de Moradores, d’Anscritos i de Botantes, cada queluna oumenta de l mais pequeinho pa l maior.

Bendo, anton, l númaro de botos de cada queluna, podemos tirar alguas cunclusones:

3.1. Tenendo alcançado 5 398 botos, l PSD ye l partido ganhador an cada un i ne l cunjunto de ls trés cunceilhos;

3.2. Tenendo alcançado 3 772 botos, ou seia, 2 626 a menos q’l PSD, l PS ye l sigundo mais botado tamien an cada un i ne l cunjunto de ls trés cunceilhos;

3.3. Tenendo alcançado 1 303 botos, ou seia, 2 369 a menos q’l PS, l cunjunto de todos ls restrantes partidos – CHEGA, IL, CDS, BE, PCP-PEV, PAN, ancluindo ls mais pequeinhos, LHIBRE, RIR, MTP, ERGUE-TE i MAS – tubírun, assi i todo, muito menos botos, pouco mais q’un terço de ls de l PS i q’un quarto de ls de l PSD;

3.4. Bendo, de la squierda pa la dreita, cada queluna de l gráfico G2, la tendéncia d’oumento de l número de botos de cada partido (PSD i PS) i de l cunjunto de ls restrantes partidos nas Legislatibas de 2022, que las respetibas quelunas amóstran, acumpanha i ye porporcional al númaro de Moradores, d’Eileitores i de Botantes de cada cunceilho.

Tengo que chamar a la atençon pa l seguinte: ambora, de l cunceilho de Bumioso – l que ten menos Moradores, Anscritos i Botantes –, passando pul de Miranda, pa l de Mogadouro – l que ten maior númaro de Moradores, Anscritos i Botantes – la queluna de cada un de ls dous mais botados (PSD i PS) i de l cunjunto de ls restrantes partidos (CHEGA, IL, CDS, BE, PCP-PEV, PAN, LHIBRE, RIR, MTP, ERGUE-TE i MAS) nas Legislatibas de 2022 bá quedando maior, isso nun quier dezir que, cumo de seguida se puode ber ne l gráfico G3, an cumparaçon culas Legislatibas de 2019, todos téngan oumentado i inda menos nessa proporçon.

4. Resultados de ls partidos nas Legislatibas de 2019 i de 2022

L gráfico G3 amostra-mos la bariaçon de las percentaiges de ls partidos nas Legislatibas 2022 an cumparaçon culas de 2019:

Amporta tamien ber las percentaiges de las botaçones de ls partidos nas Legislatibas de 2022 an cada un i ne ls trés cunceilhos de la Tierra de Miranda. Só podemos quedar c’ũa eideia mais clara se tubirmos un punto de refréncia que permita cumparar ls resultados i ber l que se passou. Claro que nun fai sentido star a cumparar l que nun ye cumparable. Assi, nun bamos a cumparar ls resultados nas Legislatibas culs de las Outárquicas ou de las Eileiçones Persidenciales ou inda culs de las Eileiçones pa l Parlamento Ouropeu; i tamien nun fai sentido cumparar las botaçones nas Legislatibas de 2022 culas de las Legislatibas d’hai muitos anhos atrás. Por bárias rezones, son, neste causo, las botaçones nas Eileiçones Legislatibas de 2019 l melhor punto de refréncia. Decedimos, aton, calcular las cfrenças antre las percentaiges de las botaçones de ls partidos nas Legislatibas de 2022 i de 2019 i apersentá-los de maneira gráfica. Assi, als resultados de 2022, subtraímos ls de las Legislatibas de 2019. Quedamos assi a saber se, i cumo, demudórun las oupçones de ls eileitores de la Tierra de Miranda.

L Quadro atrás i l gráfico G3, q’amostra la çfrença de las percentaiges de botos de ls partidos nas Legislatibas de 2022 i de 2019, permíten-mos tirar algũas cunclusones:

4.1. An relaçon a 2019, l númaro d’Anscritos ne ls Cadernos Eileitorales de 2022 baixou ne ls trés cunceilhos (-970), mas, specialmente, ne ls de Mogadouro (-430) i de Bumioso (-339);

4.2. An 2022, l númaro de Botantes oumentou ne l cunceilho de Mogadouro (+195) i, speciamente, ne l de Miranda de l Douro (+280), mas, por sue beç, baixou ne l de Bumioso (-43);

4.3. La soma de Botos Brancos i Nulos de 2022 baixou cunsiderablemente ne ls trés cunceilhos (-230), subretodo, ne l de Mogadouro (-118);

4.4. Tanto an 2019 cumo an 2022, l PSD – l partido cun mais botos i, cumo tal, l bincedor ne ls trés cunceilhos – an 2022, oumentou l sou número de botos ne l cunceilho de Mogadouro (+293) i, subretodo, ne l de Miranda (+315), mas perdiu alguns botos ne l de Bumioso (-43);

4.5. Tanto an 2019 cumo an 2022, l PS oubtubo l sigundo lhugar ne ls trés cunceilhos, tenendo an 2022, oumentado l sou númaro de botos ne ls cunceilhos de Bumioso (+55) i de Miranda (+57), mas perdido botos ne l de Mogadouro (-66);

4.6. Ne l cunjunto de ls trés cunceilhos, ls partidos que, an 2022, mais oumentórun l sou númaro de botos fúrun l CHEGA (+706), seguido de la IL (+72 botos); assi i todo, l PS oumentou mais botos que la IL ne ls cunceilhos de Bumioso (+55) i de Miranda (+57);

4.7. Cumparatibamente a 2019 i tenendo an cunta que son partidos que questúman tener poucos botos, an 2022, l BE (-262), l CDS, (-203), l PCP-PEV (-40) i l PAN (-38), cumo tamien l cunjunto de ls mais pequeinhos partidos (-184), perdírun todos eilhes muitos botos; ne l causo de l CDS, ne ls trés cunceilhos i, ne l de l BE i de ls pequeinhos partidos, an dous deilhes, la perda ye mesmo suprior al númaro de botos q’alcançórun; assi i todo, an 2022, l PCP-PEV i l PAN cunseguírun mantener mais botos do q’ls que perdírun;

4.8. Todo lhieba a crer que, ne ls trés cunceilhos, la maior parte de ls botos perdidos pul CDS, alguns de ls perdidos puls pequeinhos partidos i de l botos Brancos i Nulos teneran, an 2022, ido a parar subretodo al CHEGA i a la IL; ne ls cunceilhos de Bumioso i de Miranda, la maior parte de ls botos perdidos puls BE, PCP-PEV i PAN teneran passado, cumo boto útil, pa l PS; i, ne l cunceilho de Mogadouro, que parece ser un causo special, la maior parte de ls botos perdidos pul PS i pul PAN teneran passado pa l PSD, passando alguns de ls perdidos pul PSD pa l CHEGA i pa la IL;

4.9. Todos ls outros partidos mais pequeinhos alcançórun mui pouquitos botos, sendo mui ralas las Fraguesies/OF an que oubtenírun algun(s) boto(s).

Ne ls trés cunceilhos de la Tierra de Miranda, l PS yá tenie ganhado, oumenos ũa beç i, an dous deilhes, mais q’ũa beç, nas Eileiçones Outárquicas.

Desta beç, indas que solo por 15 – ou por 13? – botos a mais q’l PSD, l PS ganhou ne l Destrito de Bergáncia. Aton, porque será que, ganhando na maior parte de ls cunceilhos de l Paíç, l PS quedou tan loinje de ganhar na Tierra de Miranda?

Ne l miu modo de ber, nun tenerá sido por culpa de ls sous candidatos a deputados. Cuido até que, s’eilhes nun se cumpremetíssen a fazer çfrente de l que l menistro de l Ambiente i de l’Açon Climática fizo an relaçon a la benda de la cuncesson de las barraiges, cumoquiera la çfrença de botos antre l PSD i PS ne ls cunceilhos de Miranda i de Mogadouro serie inda maior. Por bias disso i inda tamien por outras rezones, yá nas Eileiçones Outárquicas de outubre de 2021 se tenie passado quaije la mesma cousa.

Ne ls cunceilhos de Miranda i de Mogadouro, adonde quédan las trés barraiges pertuesas de l Douro Anternacional, la rezon percipal de la perda de l PS tenerá a ber cula trapalhada an buolta de la benda de la cuncesson de las barraiges de Miranda, Picuote i Bemposta pula EDP. Fui por bias deste negócio que, preacupados i antecipando las trapalhadas qu’el irie a dar, bários cidadanos oureginários de la Tierra de Miranda decedírun formar l Mobimiento Cultural de la Tierra de Miranda. Al cuntrairo de l que questuma acuntecer, ls membros deste Mobimiento nun parórun nin se calhórun. Purmeiro, a tiempo i horas, alertórun l menistro de l Ambiente i de l’Açon Climática pa las manobras de l’antiga cuncessonária pa scapar de pagar las cuntrebuiçones que son debidas; apuis, nun se cansórun de chamar tamien a la atençon de la gente de l Paiç – specialmente, als deputados de todos ls partidos políticos i, até mesmo, de Sue Eiceléncia l Senhor Persidente de la República – pa la trapalhada toda an q’aquel menistro – i, cumo tal, l própio Goberno – se deixórun anrodelhar. L menistro i l Goberno quedórun, assi, cun mui mala cara ne l retrato. Lhabando las manos cumo Pilatos i fazendo crer que nun era nada cu’eilha, tamien l’Outoridade Tributária nun tenerá quedado cun melhor cara qu’eilhes.

Ne l miu modo de ber, hai algũas cousas que l nuobo Goberno, atrabeç de l feturo – i spero que nuobo – menistro de l’Açon Climática i de l’Outoridade Tributária, ten q’assigurar a la gente i als munecípios de la Tierra de Miranda: oubrigar a pagar i cobrar a las ampresas ambolbidas ne l referido negócio – la antiga i la nuoba cuncessonárias de las barraiges de Miranda, Picuote i Bemposta i inda outras mais –, i antregar als munecípios las cuntribuçones que ténen an díbeda. Cuido que, solo assi, todos eilhes deixáran de quedar cun mala cara ne l retrato i, subretodo, poderan recuperar la cunfiança de la gente de la Tierra de Miranda.

Se bien abaluo l que se passou na Tierra de Miranda i ne l restro de l Paíç nas Legislatibas de 2022 – la perda de botos de l CDS pa l CHEGA i pa la IL i de ls partidos de la Squierda, subretodo de l BE i de l PCP-PEV pa l PS –, que, debido, oumenos an parte, als zantendimientos anternos, ls anteriores botantes de l CDS, desta beç, teneran botado ne l CHEGA, na IL i ne l PSD; la trasferéncia de botos de ls partidos de la Squierda, cumo boto útil, pa l PS, fui, ne l miu modo de ber, debido a ũa asneira quaije anfantil destes partidos na botaçon de l Ourçamento de Stado de 2022 i, inda para mais, ne l causo de l BE, nin sequiera era la purmeira beç pus yá tenie botado contra l’aprobaçon de l Ourçamento de Stado de 2021. Cumoquiera tenerá sido esta la rezon de l BE tener sido l partido que perdiu mais botos, inda mais q’l CDS, q’l cunjunto de ls pequeinhos par i q’l PCP-PEV. Botando ambos a dous contra l’aprobaçon de l Ourçamento de Stado de 2022 i, inda para mais, cumo toda la Dreita, l BE i l PCP-PEV probocórun la queda de l Goberno i nuobas Eilheiçones.

Custa mesmo a crer que porfissionales de la política cométan asneiras destas. Nel miu modo de ber, la trasferéncia de botos de l BE i de l PCP-PEV pa l PS quedou inda a deber-se al miedo de l peligro que ganhasse la Dreita. Assi, al cuntrairo de l qu’inda agora l PCP fizo an relaçon a la ambason de l’Oucránia, se deixáren de cuntinar a cometer estas asneiras, ye probable que, an feturas eileiçones, quien dantes questumaba botar nestes partidos torne a botar neilhes. L nuobo Goberno de l PS i l própio partido ténen que star bien cientes disso i seguir, anton, políticas qu’eibíten perdéren estes botos. Ténen, assi, pula frente un zafio nada fácel: cunciliar ls antresses, las spetatibas i las eisigéncias destes nuobos eileitores culs de l sou eileitorado tradicional.

Bocabulairo \\ vocabulário

Abaloar – avaliar \\ abstençon/er-se – abstenção/abster-se \\ acupar – ocupar \\ alhá – lá \\ al – ao \\ al redor – ao redor, à volta \\ alredores – arredores \\ ambason – invasão \\ ambolbido – envolvido \\ ampeçar – começar \\ amportar – imporar, interessar \\ an – em \\ andicar – indicar \\ anfáncia – infância \\ anfrior – inferior \\ anganhar – enganar \\ anrodelhar – enrodilhar \\ anscrito – inscrito \\ Anstituto – Instituto \\ Anterior – Interior \\ anton – então \\ antrar/da – entrar/da \\ antre – entre \\ antresse –  interesse \\ antroduçon – introdução \\ apuis – depois, após \\ assi i todo – mesmo assim \\ aton – então \\ beç – vez \\ benir – vir \\ Bumioso – Vimioso \\ buolta – volta \\ buono – bom \\ cachico – pedacito, pouquito \\ calhórun – (forma do verbo “calhar”) calaram \\ cebil – civil \\ cfrença – diferença \\ çfrente – diferente \\ Cicuiro – Cicouro \\ cidadano – cidadão \\ çpoboamiento – despovoamento \\ çuda – açude \\ cu’el – com ele \\ cuidar – pensar, cuidar \\ cula/s – com a/s \\ cumoquiera – talvez \\ cun – com \\ cuntinar/an – continuar/ão \\ cuntrairo – contrário \\ cuntribuçones – contribuições, impostos \\ deç que – desde que \\ demudar – mudar \\ desta feita – desta vez \\ dezir – dizer \\ dir – (forma do verbo “dar”) der \\ dous – dois \\ dreita – direita \\ dũa – de uma \\ dues – duas \\ duonho – dono \\ eideia – ideia \\ eilha – ela \\ eileiçon – eleiçon \\ eileitor – eleitor \\ eilhi – ali \\ Einfanç – Ifanes \\ einiciatiba – iniciativa \\ eiqui – aqui \\ el – ele \\ eisigença – exigência \\ fraguesie – freguesia \\ fizo – (forma do verbo fazer) fez \\ fuonte – fonte \\ fuorça – força \\ fúrun – (forma do verbo ser/ir) foram \\ haba/hai – (formas do verbo “haber”) haja/há \\ inda/indas que – ainda/ainda que \\ jinela – janela \\ l/la – o/a \\ lhá – lá, além \\ lhembrar – lembrar \\ lhiente – lente \\ lhigaçon – ligação \\ lhuç – luz \\ loinje – longe \\ mala cara – má cara/figura \\ mano – mão \\ mantener – manter \\ mi – muito, mim \\ mie/miu – minha/meu \\ miedo – medo, receio \\ mos – nos \\ mui – muito, mim \\ naide – ninguém \\ neilhas/es – nelas/es \\ nino – menino \\ ningun/niun – nenhum \\ nin sequiera – nem sequer \\ nó – não \\ nũa – numa \\ nun – não, num \\ ócalos – óculos \\ oubtener – obter \\ oufício – ofício, profissão, trabalho \\ oumenos – pelo menos \\ ounion – união \\ outarca – autarca \\ outarquie – autarquia \\ outoridade – autoridade \\ pa – para \\ paiç – país \\ Palaçuolo – Palaçoulo \\ pa lhá – para além \\ pariente – parente \\ peligro – perigo \\ percipal – principal \\ pertués – portugués \\ Picuote – Picote \\ pie – pé \\ piedra – pedra \\ poboaçon – povoação, localidade \\ póngan (forma do verbo “poner”) ponham \\ pori – por azar \\ porparar – preparar \\ preacupado – preocupado \\ probe – pobre \\ proua – vaidade, orgulho \\ Pruoba – Póvoa \\ pul/a – pelo/a \\ punta – ponta \\ puoden – (forma do verbo poder) podem \\ puorta – porta \\ purmeiro – primeiro \\ pus – pois \\ qualquiera – qualquer \\ quedar – ficar \\ quegíren – (forma do verbo querer) quiserem \\ queluna – coluna \\ questumar – costumar \\ quienquiera – quem quer que seja \\ ralo – raro \\ reçbeç – resvés \\ restraran – (forma do verbo restrar) restarão \\ rezon – razão \\ riba – cima \\ Samartino – São Martinho \\ scapar – fugir \\ screbir – escrever \\ scuitar – escutar \\ solo – só \\ soudoso – saudoso \\ sperar – esperar \\ sprança – esperança \\ spreitar – espreitar \\ squecer – esquecer \\ squierda – esquerda \\ Stado – Estado \\ star – estar \\ Stramuntano – Transmontano \\ strangeiro – estrangeiro \\ stubírun/stubo – (forma do verbo “star”) estiveram/esteve \\ suprior – superior \\ talbeç – talvez \\ tamien – também \\ tenerá/téngan – (formas do verbo “tener”) terá/tenham \\ ũa – uma \\ uolho – olho \\ xordo – surdo \\ yá – já \\ ye – (forma do verbo ser) é \\ yerbasco – erva ruim/selvagem \\ you – eu \\ zambolbimiento – desenvolvimento \\ Zenízio – Genísio

 

Para saber o significado de outras palavras, sugiro a consulta do sítio:

http://www.mirandadodouro.com/dicionario/